أرسل النبى صلى الله عليه وسلم عمرو بن العاص رضى الله عنه قائدا على جيش ذات السلاسل
فلما سيدنا عمرو رجع بنشوة النصر وحاسس إنه قدم شئ لدين الله تعالى
عايز يعرف هوا فين عند النبى صلى الله عليه وسلم
كمان عايز النبى صلى الله عليه وسلم يذكره بحاجة تكون فخر ليه وشهادة وبشرى يبشره بيها النبى صلى الله عليه وسلم
فيا ترى ايه اللى حصل ؟!!
أخرج الإمام البخارى فى صحيحه عن أبى عثمان النهدى أن رسول الله صلى الله عليه وسلم بعث عمرو بن العاص على جيش ذات السلاسل ،
قال ( يعنى عمرو ) : فأتيته فقلت : أي الناس أحب إليك ؟
قال : ( عائشة ) .
قلت : من الرجال ؟
قال : ( أبوها ) .
قلت : ثم من ؟
قال : ( عمر ) .
فعد رجالا ، فسكت مخافة أن يجعلني في آخرهم .
وأنت بأه مسألتش نفسك ياترى أنت رقم كام عند النبى صلى الله عليه وسلم ؟!!
آه أنت
متستغربش
مشكلتك ومشكلتنا كلنا إنك بتستقل نفسك ومش عارف إمكانياتك
يعنى مين كان يصدق إن سيدنا عمر بن الخطاب يبقى الرجل الثانى عند النبى صلى الله عليه وسلم وهو الذى كان يقال عنه قبل إسلامه " والله لو أسلم حمار الخطاب ما أسلم عمر "
كل القصة لحظة صدق تحب فيها النبى صلى الله عليه وسلم بصدق
وتنطلق >>>
هتفضل لغاية امتى واقف مكانك ؟!!
قوله بحبك ... قولها من قلبك .... وحبه بأه يا أخى
ووالله لو حبيته مش هتقدر تستحمل إنك تتحرم منه فى الآخرة زى ما اتحرمت منه صلى الله عليه وسلم فى الدنيا
هتشتغل فى طاعة ربنا سبحانه وتعالى وتعمل لدينه وتغير نفسك علشان تبقى مع النبى صلى الله عليه وسلم فى الجنة وتقوله يارسول الله هوا أنا ايه عندك ؟
أحد التابعين بيقول لنفسه لما لقيها كسلت عن الطاعة :
" لقد كان الصحابة خلف النبى صلى الله عليه وسلم على جياد مضمرة ( خيول سريعة ) ونحن خلفهم على حمر عرجاء
أفتريدين أن تقعدى بنا عنهم فيفوزوا برسول الله ونقعد !!
والله لنلحقن بهم ولو حبوا حتى يعلموا أنهم قد خلفوا رجالا "
بيقول لنفسه : أنتى عايزة تقعدى علشان الصحابة يفوزوا بالنبى صلى الله عليه وسلم ونخسره ؟!! , أبدا مش هيحصل
روى أيضا عن أبى مسلم الخولانى التابعى الجليل إنه كان بيقوم الليل , ولما يتعب يضرب رجليه بالسوط ( الكرباج ) ويقول :
" أيظن أصحاب محمد أن يستأثروا به دوننا ،
كلا والله ! لنزاحمنهم عليه زحاماً حتى يعلموا أنهم قد خلَّفوا وراءهم رجالاً "
هما أصحاب محمد فاكرين إن النبى صلى الله عليه وسلم هيكون ليهم وبس ؟!!
لا هنزاحمهم عليه عند الحوض
بس كلام وبس مينفعش
لازم فعل ولازم عزيمة ولازم تعب
علشان لما تقول بحبه يبقى حب حقيقى
حب بجد مش مجرد كلمات مستهلكة أو نغمة رنين تحطها على تليفونك
نسأل الله تعالى أن يرزقنا صدق المحبة وصدق الإتباع
الأحد أكتوبر 05, 2014 6:45 pm من طرف 
