إنت Selfish ولا بتحب نفسك؟

إنت
Selfish
ولا بتحب نفسك؟
قد يبدو السؤال غير شوية


بس إنت بحب نفسك ولا إنت أنانى ؟
ممكن حد يقول وإيه الفرق ما بينهم ما الإتنين حاجة واحده


أقولك لأ إستنى


حب النفس شئ

والأنانية شئ تانى خالص

حب النفس ده شئ محمود – مهم إن كل واحد يحب نفسه

لأن لو أنت ماحبتش نفسك مين هيحبها !!

ولو إنت ماكنتش حريص على مصالحك مين هيهتم !!

مثال كده صغير نوضح فيه

لما حد بيحب حد بيبقى بيخاف عليه

بيبقى عاوز يعمله كل حاجة تفرحه بيبقى بيهتم بيه

بيشوف إيه بيزعله ومش بيعمله

بيشوف إيه ممكن يجرحه ومش بيعمله

بيحافظ عليه

بيشوف إيه يفيده وبيعمله

بإختصار بيحبه

طيب

فى ناس بتبقى بتكره نفسها

حد ممكن يقولى هو فى حد بيكره نفسه


أقولك آه فى

تلاقى الحد ده طول الوقت

تاعب نفسه

مخلى كل غلط غلطه فى حياته صورة قصاده مش بتتشال - مش بيسامح نفسه

مخلى صورته الذاتيه قصاد نفسه وحشه جدااا

طول الوقت تاعب دماغة تفكير

طول الوقت شايل هموووووووووم جبال مش سايبها على اللى خلقة فى الدنيا دى

تلاقيه متشائم

تلاقى بيساعد كل اللى حواليه لكن ... مش بيساعد نفسه

على طول مخنووق

على طول ظالم نفسه

حاطت نفسه فى دايرة سوده وحشه جدااا

مش بيحاول يكون مبسوط

مكتئب

لو الشخص ده حب نفسه مش هيعاملها المعالمه الوحشه دى

لو الحد ده كان بيحب حد تانى كان هيسامحه

طيب ما إنت أولى حد تسامح نفسك

وبعدين ثقتك فى ذاتك هتكون مهزوزه

منطوى


إوعى تكون كده

إوعى تكون عدو نفسك

نفسك ليها حق عليك

من حقها إنت تفرحها شويه

إنسى دفتر ذكرياتك المتعبه

دور فى دفاترك هتلاقى حاجات كتيير تسعدك

حبها

ماتسمحش لنفسك إنك تكون محطه فى حياة الناس خلى أهدافك نصب عينك

مين هيحب إن تكون فى الفردوس الأعلى غير نفسك !

مين اللى بأعماله هى اللى هتوديه الفردوس مش أقل من كده غيرك إنت !

خليك فوق

إرتقِ

ماتخليش الناس هى اللى تحدد حياتك

إزاى الكلام ده

أقولك إزاى

فى الدنيا دى هتلاقى ناس كتيير بتحاول تبعدك عن هدفك سواء بشكل مقصود أو غير مقصود
بشكل غير مقصود ده من حبها لنفسها بس ده حب وصل لدرجة الأنانية

بس إنت خليك ماشى بمبدأ


" الملتفت لا يصل "

سيبك من الناس اللى بتقارن

من اللى بيغضبك

من اللى بيحاول بيحطمك

" الملتفت لا يصل "

مهما تقابل من تحديات وعقبات فى طريقك

ماتلتفتش

خليك أعلى

ركز على هدفك وإوعى تكون جزء من أهداف الأخرين

جميل إن الواحد يبقى بيساعد غيره وبيكون سعيد بده بس إوعى يكون هو ده هدفك كده بس فى الحياة
لأن هتلاقى اللى بيستغلك وتيجى تبص تلاقى نفسك ماعملتش حاجة فى حياتك كلها

فركز فى هدفك وشوف إنت عاوز إيه وركز عليه
وخليك إيجابى

وبلاش تكلم نفسك بشكل سلبى

وإعرف
"ما تكرر تقرر"

فرح نفسك وقلها كلام يطمنها فى الدنيا دى

فرحها وقلها إنك تقدر توصل لأهدافك بالإستعانه بالله

وإنسى اللى فات بكل مافيه وإبدأ حياتك وإنت بتحب نفسك

وفى مقوله أقولها هنا


"you can't start the next chapter of your life if you keep re-reading the last one"

" مش هتقدر تكمل باقى فصول حياتك طول ما إنت لسه بتقرأ فى الفصول اللى خصلت "

حياتك كده كده عايشها ومش بإيدك تنهيها
ماتعيشها وإنت مبسوط

علشان تقدر توصل لأهدافك اللى توصلك لربنا

حب نفسك وإعمل كل حاجة تفرحها بما يرضى الله

حب نفسك وخليها فى ترتيبك رقم واحد مش الناس - طالما مش بتظلم حد علشان توصل لأهدافك وماحدش يأخرك

حب نفسها وقلها كلام يشجعها إنها تكمل

حب نفسك وإهتم بيها و زكيها بمعرفة دينك و بالقراءة عموماً

حب نفسك وخليها تكون ناجحه

ناجحه فى علاقتك بالناس وعلاقتك بربنا و مستقبلك العلمى والعملى

حب نفسك علشان الناس تحبها وتقدرها

حب نفسك وإهتم بصحتك ونفسيتك

حب نفسك وعيش بنفسيه جديدة كلها حب وتفاؤل

و إوعى تقلل من قيمة نفسك

"عن عائشة قال رسول الله صلى الله عليه وسلم لا يقولن أحدكم خبثت نفسى ولكن ليقل لقست "

فى ناس الإيجو عندها عالى يعنى أنانية

الناس دى بجد لو فضلت مش بتحب نفسك هتضيع بسببهم
لأن دول عندهم نفسهم رقم واحد حتى لو على حساب غيرهم – حتى لو هيظلموا غيرهم المهم نفسهم وبس

وده طبعاً حاجة من أمراض النفوس ربنا يعافينا جميعا

فحب نفسك بس من غير أنانية
هى بجد تستاهل إنها تتحب

وهى فى النهاية حياتك إنت .. عيشها بالشكل اللى تحبه واللى تبقى مبسوط لما الرسول يشوفك بيه

وصل اللهم وبارك على سيدنا محمد...

عليه الصلاه والسلام بجد الكلام ده روعه

تسلمى

صلى الله عليه و سلم
شكرا يا اسراء

العفوا حبيبتى